Vogio farve na premessa,
mi no so na poetessa
ma conosso el venessian
e so nata a Buran.
Qua ghe riva anca i artisti
e a se meta de turisti
che ogni giorno i ze incalcai
par comprar i bussoai.
Ma no a ga soeo che questo
ze da veder ancar el resto
dai merletti ae casette
e ae caette tutte strette.
No da manco el campanil
mezo storto e no par el vin
Che man man ti arrivi in piassa
Ti alsi a testa e par che o casca.
Ze fazendo su e zo pal ponte
che ti trovi e corti sconte
Tanto bee da vardar
parché e ze specciae in canal.
A ga e case che fa ciasso
che par un quadro de picasso
tutte de tanti coeori
co i balconi pien de fiori.
Anca quando ze maltempo
acqua alta, piova e vento
Ab ga un fascino regal
e par questo a ze special.
Co ti a vedi daea leguna
Ea te porta gran fortuna
Co ti rivi col batteo
Ti pol dir soeo che beo.
Vogio adesso ringrasiarte
Par no aver messo da parte
Gran lavori e tanta arte
E te o digo col cuor in man
Quanto bea ti ze Buran
