Varda qua che maravegia
E do de notte e ancora svegia
Tra e vampae e e caldane
E do squee de tisane
Me scoverzo in piena notte
Coa paura de vantà e botte
Dal mario che dorme in fianco
Manco mal che chel ze un fià stanco
Co ti t’alsi aea mattina
Te par d’esser in banchina
Tutta mogia de suor
E cento battiti de cuor
In bottega vago in cassa
Tutta rossa e paonassa
No parchè so emossionada
Ma so in preda a na vampada
Ze passà in cinquant’anni
Riva acciacchi e anca maeanni
Se parlemo dea memoria
Quea ze n’altra bea storia
Se i sauda paea strada
I t’a rovinà a giornada
Ore e ora a ripensà
Ma chi gera sto cristian???
Anca se ti magni manco
Te par ver un budda in fianco
Casca tutto verso el basso
Ecco che riva el prolasso
Par che vaga tutto ben
Ma ti ze piena de veen
Basta che i te diga A
Ti i ga già mandai a cagà
Sue giunture te ghe vol
Cento kii de svitol
Sensa tante eccession
Sua musana el silicon
No parlemo po’ dea vista
Te ghe vol un apripista
Da vissin o da lontan
Ti a da metterte l’ocial
Ghe ze un lato positivo
E co questo mi convivo
Semo donne de cosciensa
E co tanta esperiensa
Ogni mese semo sensa
De un ingrata sofferensa
Che n’a fatto triboar
Co doeori e tanto mal
Sta co chi te vede un fior
E te varda cò amor
Megio perder che trovar
Chi da drio te parla mal
Vedarè che dopo passa
E sbrogiemo sta matassa
Forti e bee più de na volta
Pronte a far n’altra rivolta.
